Bols

Saga hollenska drykkjarframleiðandans Bols nær næstum því 445 ár aftur í tímann því það var á því herrans ári 1575 sem nokkrir framtakssamir menn í höfuðborginni Amsterdam tóku sig til og hófu að búa til drykki sem þeim þótti vanta á markaðinn. Fyrstu líkjörarnir sem þeir löguðu voru kúmenlíkjör, karemommulíkjör og appelsínulíkjör. Fyrirtækið fór þó ekki á flug fyrr en tæpum 75 árum síðar. Þá var Lucas Bols, barnabarn stofnandans, orðinn stjórnandi fyrirtækisins. Hann var stór hluthafi í Austur-Indíafélaginu og það gaf honum ómetanlega sérstöðu; hvenær sem skip komu siglandi til Hollandi heim frá fjarlægum löndum, drekkhlaðin framandi dýrindis kryddum og jurtum, var hann með þeim fyrstu til að velja sér skammt. Í kjölfar fór þróunarstarfið hjá Bols á yfirsnúning og fyrr en varði voru líkjörar frá Bols alls orðnir um 300 talsins.

Vatnaskil urðu svo aftur í rekstrinum árið 1664 þegar Bols-fjölskyldan hóf að framleiða sénever, drykkinn sem Bols er þekktast fyrir enn þann dag í dag. Vöruvalið er orðið gríðarlega breitt, með sénever, gini og vodka, fyrir bragðbætta líkjöra af öllu mögulegu tagi sem eiga það sammerkt að gera líf og starf barþjóna um víða veröld talsvert fjölbreyttara og áhugaverðara. Líkjörarnir eiga það líka sameiginlegt að vera allir seldir í flösku með sama laginu, en hún var kynnt til sögunnar árið 2004 og er sérhönnuð til að auðvelda barþjónum starf sitt, ekki síst þegar þeir eru undir álagi og mikilvægt að geta unnið hratt.