Gammel Dansk

„Eins dauði er annars brauð,“ segir máltækið og er ýmislegt til í því. Það á til dæmis algerlega við í tilfelli eins frægasta snafs Dana, og er þar átt við sjálfan Gammel Dansk.

Þannig er mál með vexti að á árunum rétt fyrir 1960 fór salan mjög að dala á vinsælasta snafsinum sem framleiddur var í þá daga af danska  drykkjarframleiðandanum Danske Spritfabrikker í Hróarskeldu. Nú voru góð ráð dýr og ljóst að eitthvað varð að gera ef fyrirtækið átti að haldast áfram í rekstri. Framkvæmdastjórinn, J.K. Asmund, sagði að hann væri með hugmynd; hann hefði lagt stund á grasafræði og hefði í kolli sínum hugmynd að drykk sem hann hefði talsverða trú á. Við tók langt og strangt prófunarferli þar sem hver samsuðan rak aðra, uns einhver galdur átti sér loks stað og fæddist hinn nýi drykkur árið 1964. Svo mikil var ánægjan með afraksturinn að í dag man enginn hvað gamli snafsinn hét, sá er tekinn var að dala í sölunni.

Hinn nýi drykkur sló algerlega í gegn enda líktist hann ekki neinu sem fyrir var á markaðnum. Menn gerðu mikið til að reyna að átta sig á því hvaðan margslungið bragðið kæmi en allt kom fyrir ekki. Enn í dag er uppskriftin vitaskuld hernaðarleyndarmál, en þó er viðurkennt að meðal innihaldsefna er negull, anis, engifer og reyniber. Eru þá ótalin 25 aðrar jurtir, krydd og blómategundir sem ljá þessum hressandi drykk sinn einstaka og ómótstæðilega bragðkeim.