Goslings

Stundum getur tilviljun ein ráðið því að eitthvað stórmerkilegt gerist. Tilurð rommgerðarinnar Goslings er dæmi um slíkt. Það sem gerir sögu fyrirtækisins enn áhugaverðari er að rommið og öll saga þess sprettur út frá Bermúda en algengara er að hlutir hverfi þangað og sjáist aldrei meir, með vísan í hinn alræmda Bermúda þríhyrning. Blessunarlega er þessu öfugt farið hér.

Upphafið má rekja til ársins 1806, þegar hinn vaski sveinn James Gosling – elsti sonur vínkaupsmannsins William Gosling – lagði úr höfn í borginni Gravesend í Kent, í Suð-Austur Englandi, ekki langt frá árósum Thames. Skip hans, Mercury, var drekkhlaðið dýrindis varningi og stefnan sett á Ameríku. Skipið hreppti illu heilli steindauðan sjó svo ekkert gekk né rak. Þarna hefur hinn ungi James greinilega lent með skip sitt í lognsævinu sem einkennir Sargasso-hafsvæðið sem er að finna austur af Flórída-skaga og er umlukið fjórum megin-hafstraumum sem umlykja það með snúningi réttsælis og skapa jafnan varhugaverðar aðstæður fyrir skip sem þurfa vind í seglin.

Allt um það, þegar allur skipskostur var á þrotum eftir níutíu daga rek sást loks til lands og Gosling og félagar komust við illan leik í fyrstu höfn sem að höndum bar. Það reyndist vera St. George’s á Bermúda. Dvölin þar varð heldur lengri en til stóð í fyrstu því mannskapurinn undi hag sínum geysivel á hinum veðursælu Bermúda-eyjum. Til að gera langa sögu stutta afréð Gosling-fjölskyldan að gera eitthvað sér til viðurværis, og þar sem hún bjó að reynslu í verslun og viðskiptum með vín lá beint við að prófa eitthvað slíkt. Hráefnið á staðnum – sykurreyr – bauð upp á rommgerð, og eftirleikurinn er kafli í rommsögunni; dökkur og dásamlegur.