Highland Park

Þetta margverðlaunaða viskíhús er staðsett á eynni Orkney, norður af Skotlandi, og eins og eyjaviskía er oftar en ekki háttur eru í því móreykjartónar. Þó er Highland Park víðsfjarri þungum reykjarmekki Laphroaig, og í því fléttast fíngerðar bragðnótur villihunangs og maltaðs korns saman við mildan móreykinn. Húsið hefur starfað allar götur síðan 1798 og hreppir reglulega verðlaun fyrir bragðgæði; 21 árs Highland Park hlaut meðal annars titilinn “World’s Best Single Malt” árið 2009. Stofnandi Highland Park hét því norræna nafni Magnus Eunson (ef til vill fæddur Jónsson?) og væri ráð fyrir sagn- og ættfræðinga að kanna hvort kappinn var ef til vill íslenskur að upplagi? Hann var alltént beinn afkomandi norrænna manna. Í honum rann ekki bara víkingablóð heldur líka baldinn víkinga-andi því hann hóf sína viskígerð sem ólöglegur bruggari, og býsna stórtækur sem slíkur.

Allar götur síðar er það svo að framleiðendur Highland Park hampa mjög víkingarótum sínum. „Stoltir, ævintýragjarnir og óstjórnlega sjálfstæðir,“ eru þrír eiginleikar sem víkingar eiga að hafa blásið viskígerðinni í Highland Park í brjóst. Þarna er vísað í þá staðreynd að frá árinu 800 til 1468 ríktu Norrænir jarlar á Orkney og mergjaðar sögur um þá má lesa í Orkneyinga Sögu og áhrifin leyna sér ekki þegar borgin Kirkwall er heimsótt. Þar er að finna hina stórfenglegu dómkirkju St. Magnus Cathedral, eða Magnúsarkirkju, sem heitir eftir frægasta norræna jarlinu af Orkney, Magnúsi Erlendssyni. Enn í dag ber einn af hverjum þremur íbúum Orkneyja í sér norrænt blóð (víkingablóð, eins og þeir kalla það) og þeir eiga sinn eigin fána, sem er áþekkur norska fánanum, utan að hvíti liturinn í þeim norska er gulur í þeim Orkneyska.