Leffe

Hinn belgíski Leffe er einn hinna rómuðu belgísku klausturbjóra og upphaf hans má rekja til ársins 1240. Það var þá sem munkarnir í klaustrinu Notre-Dame de Leffe hófu bruggið, en Leffe er nafnið á hverfi í norðurhluta bæjarins Dinant sem er að finna í hinum vallónska hluta Belgíu, skammt frá frönsku landamærunum. Munkarnir lögðu ríka áherslu á gestrisni enda lá straumur pílagríma jafnan gegnum bæinn, og buðu þeir gestum og gangandi að fá hressingu af heimabrugginu, enda var það miklu öruggara en að gefa ferðalöngum vatn sem gat verið smitað af hvers kyns pestum en við bjórgerðina var vatnið soðið og þar með allsendis gerilsneytt. Saga Leffe er því tæplega 800 ára og nýverið opnaði Maison Leffe dyr sínar fyrir gestum og þar gefst færi á fræðslu jafnt sem bjórsmakki í ævagömlu klaustrinu í bænum Dinant.

Leffe fæst í dag í nokkrum útfærslum og þar af eru grunngerðirnar, ljós og dökkur, langvinsælastir.

Leffe Blonde hefur góða fyllingu, er þurr með sætuvott, ferskur, miðlungsbeiskja með þéttan malt- og negulkeim og mjúka ávaxtatóna. Hann passar vel með ýmsum kjötréttum og sérstaklega grilluðu svínakjöti ásamt reyktum og gröfnum laxi og úrvali osta.

Leffe Brüne er dökk-hnetubrúnn að lit og falleg froða prýðir bjórinn í glasi sínu. Bjórinn hefur góða fyllingu í munn og matarmikill með smá karamellu . Bragðmikið og flókið bragð með ljúfum sætum malt og ávöxtum. Ljúfur eftirkeimur sem varir lengi. Hann passar vel með sætum réttum, Parmaskinku, ostum og tómat pastaréttum.