Löwenbräu

„Ljónsbruggið“ á sér langa samfellda sögu hér á landi, og nær hún reyndar allt aftur til þess dags er bjór var leyfður aftur á Íslandi, sjálfan Bjórdaginn 1. mars 1989. Saga sjálfs bjórsins er mun lengri og ku ná allt til ársins 1383 en hann hefur frá upphafi verið bruggaður í München, höfuðborg Bayern-héraðs (eða Bæjaralands, eins og það kallast á íslensku) og er því einn sex bjórtegunda sem leyfilegt er að bera fram á Októberfest þar í landi. Vinsældir hans eru því ótvíræðar og þar er samhljómur milli Þjóðverja og Íslendinga. Í árdaga bjórsins  hér á landi var það nefnilega hinn þýski Löwenbräu sem bar höfuð og herðar yfir aðra bjóra hvað vinsældir varðar. Óhætt er að segja að ýmislegt, eiginlega næstum allt, hefur breyst hvað varðar úrval bjórs í boði hér á landi og áhuga Íslendinga á bjór, en enn þann dag í dag er Löwenbräu mest seldi þýski bjórinn. Það kemur lítt á óvart enda um sérlega vandaðan, bragðmildan og þægilegan ljósan lagerbjór að ræða, 5,2% að áfengismagni. Marga vegsemd hefur bjórinn sá hlotið gegnum aldirnar og síðast má nefna að hann var sæmdur gullverðlaunum á World Beer Cup 2016 í flokknum „Münchener Style Helles“ eða Ljósir bjórar í München stíl.