Quinta do Portal

Quinta do Portal er fjölskyldufyrirtæki sem ávallt hefur lagt áherslu á að vera það sem kallast „boutique winery“ – við getum kallað það handverksvíngerð. Skilgreiningin er nokkuð á reiki en almennt er talað um að slík fyrirtæki séu smá í sniðum, einbeiti sér að gæðaframleiðslu í stað þess að framleiða í miklu magni, og tengi ímynd sína við lífstíl; framleiðslan er vín í háum gæðaflokki fyrir þá sem vilja aðeins það besta. Quinta do Portal framleiðir DOC Douro vín, hágæða púrtvín og Moscatel desertvín. Starfsemin nær ekki lengra aftur en til síðasta áratugs 20.aldarinnar en engu að síður hefur Quinta do Portal þegar hlotið margvísleg verðlaun og viðurkenningar, bæði heima í Portúgal og á heimsvísu.

Hvort á að segja „púrtvín“ eða „portvín“? Þú mátt ráða. Portúgalir tala um „Vinho do Porto“ og upp á engilsaxnesku segir maður bara „Port“. Það sem þarf að hafa á hreinu er að portvín eru styrkt vín úr þrúgum, sem alla jafna gefa af sér smágerð ber með þéttum og bragðmiklum ávexti sem hentar í vín til geymslu. Portvín mega aðeins kallast svo ef þau eiga sér uppruna í Douro-dalnum í Norður-Portúgal. Þau eru oftast sæt á bragðið og henta því afbragðsvel sem eftirréttavín, ýmist ein og sér (fínustu árgangaportvín eru mikil dýrindi og fer best á því að þau séu borin fram ein og sér svo bragð þeirra fái að njóta sín óbeislað og óáreitt) eða með svolitlum matarbita og þá er ekki ónýtt að hafa gómsæta osta við hendina. Önnur portvín fara einnig sérlega vel með sætum eftirréttum. Portvín eru jafnan í kringum 20% að áfengismagni og kjörhitastig þeirra þegar þau eru borin fram er á bilinu 15-20°C.