Rapitalá

Saga víngerðarinnar Rapitalà hefst árið 1968 þegar Hugues Bernard, greifi af Gatinais og foringi í franska sjóhernum, fæddur á Saint-Malo í Frakklandi árið 1940, gekk að eiga Gigi Guarrasi, en hún var afkomandi einnar af valdamestu aðalsættum Palermo á Sikiley. Hjónakornin lögðu upp í spennandi ævintýri, að endurgera og nútímavæða vínkjallarana sem orðið höfðu jarðskjálftanum í Valle del Belice að bráð.

Helsta áhugamál greifans var ræktun sérstakra afbrigða af vínviði og fyrir um 30 árum síðan hóf hann að rækta frönsk afbrigði meðfram þeim ítölsku. Það gekk að óskum og í dag er það sonur þeirra hjóna, Laurent, sem heldur merki foreldra sinna á lofti með sömu umhyggju og ástríðu og ávallt hefur einkennt víngerðina í Rapitalà. Fyrir bragðið er Rapitalà ein virtasta víngerð Sikileyjar og óumdeild stjarna meðal hinna endurreistu vínhússa á eynni.

Vínekrur fyrirtækisins þekja alls um 225 hektara í hlíðunum frá Camporeale til Alcamo. Hæðardrögin þar sem vínviðurinn vex eru í 300-600 metra hæð yfir sjávarmáli, ýmist í leirkenndum jarðvegi eða sendnum og aðstæður allar eru eins og best verður á kosið til að rækta og framleiða öndvegisvín.

Þess má loks til gamans geta að orðið „Rapitalà“ á uppruna sinn í arabísku og kemur úr hugtakinu „Rabidh-Allah“ – „fljót Allah“, og er dregið af ánni sem rennur um vínekrurnar. Nafnið er ótvíræð sönnun þess að landið hefur verið ræktað til víngerðar frá örófi alda.